TACLOBAN CITY – Makusog an ebedinsya nga ginkakaptan yana han Tacloban PNP ha suspek nga pumatay ha 17-anyos nga babayi ha Brgy. 91 Abucay, Tacloban City.
Ginkilala an suspek nga hi Arjhon Badilla Lagarto, 24 anyos, residente ha nasabi nga lugar.
Sumala kan P/Capt. Daniel Polo, Tacloban PNP-Abucay station commander, igintudlok han ira witness hi Lagarto nga hiya an pumatay kan Juliah Casandra Quisumbing, 17 anyos.
Siring ni Polo, dumaop mismo an witness para tumistigo ha natabo nga krimen. Mayada gihap hira mga ginkakaptan nga ebedinsya.
Nakuhaan pa hin matarom nga butang hi Lagarto han maaresto dida han miyerkules, October 23.
Samtang, may mga nagpo-post ha social media nga nagsayop an mga otoridad ha ira gindakop suspek, sumala kan Polo, ini nga mga nagrereklamo pwede pumakadto ha ira station para makagtestify nga diri hi Lagarto an suspek.
Mababaruan nga ginpamumuno patay hi Quisumbing dida han October 19.
