Roxas City, Capiz- Ginsaysay sang tag-iya sang Groogy KTV Bar ang pila ka mga eksena nga nasaksihan sini sa natabo nga komosyon sang nagligad nga gab-i nga ginkamatay ni Kapitan Ruben ‘Godo’ Fuentes kag ginkapilas sang BPAT member sini nga Ceasar Edrosolano.
Suno sa tag-iya nga si Marilou Abaracoso, upod sang suspek nga si Rogelio Vigor nga naga-inum ang anum ka iban pa sa sulod sang KTV Bar pasado alas 9 sang gab-i sang gulpi ini nga nagatuga sang Gamo paagi sa paghaboy sang botelya sang beer sa sulod sang balay-ilimnan.
Bangud nga naka-inum na kag hubog ang amo nga persona, ini ang ginpaguha na lamang sa amo nga lugar apang ginkakibot na lamang sang mga ini nga nagkinagamo na guha. Ginsundan ini sang pagsulod sang BPAT member nga si Ceasar Edrosolano.
Sang pagguha ni Marilou Abaracoso, nakit-an na lamang sini si Kapitan Ruben ‘Godo’ Fuentes nga ara sa lugar kag duguon kun sa diin ini ang nag-angkun sang pilas sa dughan kag kilid.
Gindala pa sa ospital si Kapitan Godo Fuentes apang ini ang gindeklarar nga ginbawian sang kabuhi.
Sa subong yara na sa kostudiya sang Roxas City PNP ang suspek nga si Vigor kag upod sini nga Joseph Jamora. Narekober man sa mga ini ang kutsilyo nga ginapatihan gingamit sa krimen.
