General Santos City—Priso na karon sa selda sa Police Station 1 ang tulo ka mga suspect nga lambigit matud pa sa investment scheme atol sa gihimong entrapment Operation sa kapulisan nga sakop sa Police Station 1, Regional Special Operation Group, CIB ug RID 12 alas 5:45 ang takna sa hapon sa usa ka restaurant nga nahimutang sa national highway, ning syudad.
Giila ni Police Master Sergeant Javierto Abranilla, Chief Investigator sa Police Station 1 ang mga suspect nga silang Ailene Manahan, 35 anyos, tag-iya sa ACSI, nga nanimuyo sa Barangay Mabuhay; Bonifacio Umambac, 31, Speaker ug nanimuyo sa Valencia Bukidnon ug Lourdes Ceria, 56 anyos, secretary ug nanimuyo sa Gensan Ville, Barangay Bula.
Sumala pa ni PMSSGT Abranilla nga miduol matud pa kanila ang usa ka biktima nga nanimuyo sa Sarangani Province nga gina-recruit kini sa nahigutang grupo nga akma Community Solution Incorporated hinungdan nga gipahigayunan ug operasyon kung asa malampuson man nga nasikop ang mga suspect.
Dugang pa ni Abranilla nga kompleto matud pa sa gamit ang mga nahisgutang suspect ug murag lihitimo gayud nga negosyo ang ilahang dala hinungdan nga aduna gihapon silay mailad.
Ang sistema matud pa sa negosyo sa mga suspect ang mang-invite sila ug mga biktimahunon ug ilahang ipailalom sa orientation aron nga ma-awhag nga mo-invest kanila bugti sa pipila kaporsyento matag bulan sa ilahang ilahang capital. Apan magsige lang matud pa sila ug saad hangtod sa dili na mabalik ang kwarta sa mga biktima hinungdan nga ang usa sa mga reklamante ang nag patabang sa kapulisan.
Sa kasamtangan gi-andam na ang kaso batok sa mga nasangpit nga suspect nga nag tingkagol sa Police Station 1.
Samtang hugot man usab nga gipanghimakak sa usa ka Ailene Manahan ang tag-iya sa ACSI kon Akma Community Solution Incorporated nga sila naga-pangilad ug tawo pinaagi sa pagpapay-in ug kwarta.
Sumala pa sa nahisgutan nga dili matud pa sila investment company nga naga-promesa ug dagko nga interest sa capital sa kwarta sa mga investors sanglit sila usa ka networking company nga dunay ginabaligya nga produkto ug bugtong registration fee lang ang ilahang ginasingil ngadto sa buot moapil sa ilahang networking.
Dugang pa niini nga nakurat nalang sila nga samtang nagapahigayon sila ug presentasyon alang sa ilahang networking misulod ang mga pulis ug sila gidakop. (Dave Silagan)
