TACLOBAN CITY – Nakuha han usa nga estudyante han Philippine Science High School Eastern Visayas campus an grand prize han third annual Breakthrough Junior Challege. An mao nga kompetisyon in usa nga Annual Global Competition nga nag-aaghat ha mga estudyante nga nag eedad 13-18 nga igpakita an ira passion ha Math ngan Science ha bug-os nga kalibutan pinaagi ha paghimo hin 3-minute video nga may tagsa-tagsa nga konsepto o teorya ha science, physics o mathematics.
Ha ginbuhat nga annual breakthrough prize ha NASA’s Ames Research Center ha Mountain view, California, USA gin-anunsyo hi Hillary Dianne Andales, Grade 12 student ngan physics major ha PISAY ngan grand prize winner kontra ha sobra 11,000 nga mga estudyante tikang ha 178 nga nasod nga umapi ha mao nga kompetisyon.
Hiya in makakakarawat hin $250,000 kumo educational prize. Makakakarawat gihapon an iya teacher hin $50,000 ngan an iya eskwelahan in matitindugan hin bag-o nga Science laboratory nga nagkakantidad $100,000 tikang ha Cold Spring Harbor laboratory.
Dida han 2016 in nasakob hi Hillary ha top 6 han kompetisyon, ngan ha pagbulig niya utro ha yana nga tuig nga kompetisyon in hiya na an grand winner.
Labot la ha pagdaog ha Breakthrough Junior challege, in naging champion gihapon hi Hillary ha Metrobank-MTAP-DepEd math challege. Hiya gihapon in nanguna ha Regional Council of the Philippine Society of Youth Science clubs ngan naging delegado ha Japan-Asia Youth Exchange Program in science ngan naging author pa han usa nga mathematics review book para han grade 5 ngan 6 students.
