Tatlo na ang nakumpirmar nga napatay sa nagluntad nga sunog sa NCCC mall sa Davao City nga taga-South Cotabato.
Suno kay Provincial Disaster Risk Reduction and Management Action Officer Mila Rivera ginkilala ang duha nga nadugang kanday Dresiree Gayle Zacarias sang Bo. 10 sa banwa sang Sto. Niño kag Jim Benedict Quimsing, 25-anyos sang Barangay Liwanay, Banga, South Cotabato.
Madumduman nga nauna nga nakumpirmar nga napatay sa sunog sa NCCC mall si Rhenzi Nova Muyco, 25-anyos sang banwa sang Banga.
Samtang ginkumpirmar ni Maam Rivera nga natalana naman nga ilubong sa Disyembre 30 subong nga tuig sanday Rhenzi Nova Muyco kag Dresiree Gayle Zacarias sa bahin sang Davao City.
Ginkumpirmar man sang amay ni Jim Benedict Quimsing nga sa Davao City na lang man nila ilubong ang bangkay sang anak.
May-angot sini suno kay Maam Rivera magapadulong sila bwas nga adlaw sa Davao City agud nga hibaluon kon ano pa ang mahatag nga ayuda sang Provincial Government sa pamilya sang mga biktima sang NCCC mall fire incident, matapos nga may ayuda man ang NCCC Davao, SSS kag National Government.
