BACOLOD CITY – Nagpadulong sa istasyon sang pulis ang isa ka security guard agud ipa blotter ang pagkadula sang iya service firearm sa gwa sang Terra Bldg. sa dalan Galo-Gatuslao, Bacolod City mg alas 4:10 kahapon sang kaagahon.
Ang tagreklamo nakilala kay Marven Noblesa, 26 anyos ang edad, kasado kag pumuluyo sang Had. Estelabe, Brgy. San Miguel, La Carlota City kag naga-obra bilang security guard sang amo nga building.
Suno kay Marven nga ini siya ang nagapulu-pungko sa sulod sang isa ka naka park nga salakyan para maghulat sang iga deliver nga newspaper.
Apang bangud nga kaagahon, ini siya ang napiyungan kag nakabugtaw na lamang ini sang iya nabatyagan nga may naga-giho sa likod kag may nagapang-flashlight.
Ginpahayag ni Marven diri kag iya na gid lamang nadiskburehan ng wala na ang iya service firearm nga isa ka Armscor 9 mm pistol.
Sa iya pagpanaug, suno kay Marven may nasugata siya nga tawo kag nagsugid sa iya nga may nakita ini nga duha ka mga menor de edad nga kabataan nga nagpalapit sa ginhamtangan sang amo nga security guard.
Naga suspetso ang sikyo nga ang nakita sang tawo nga duha ka menor de edad amo ang nagkuha sang iya armas./ Google photo
