Davao City – Gihimakak sa Tagum PNP nga usa ka terrorist activity ang nahitabong pagbusikad niadtong Sabado sa gabii, Marso 23, atubangan sa Livestock Auction Center sa Tagum City Public Market taliwala sa mikalat nga impormasyon sa social media.
Sa opisyal nga pamahayag ni P/Supt. Philip Jefferson Ayban, Chief of Police sa Tagum PNP, usa lamang ka mechanical explosion nga miresulta sa pagbuto sa makina sa usa ka motor nga nakaparada duol sa maong lugar base usab sa ilang inisyal nga imbestigasyon.
“Confident kami nga ibalita sa publiko nga kini dili tungod sa granada o bomba nga maoy gakalat karon sa mga social media sites,” saysay niini.
Dugang ni Ayban nga ang mga fragmented fiber objects gikan sa makina ang hinungdan sa pagkahiagom og slight injury sa walo ka tawo kinsa daling na-discharge sa balay-tambalanan human sa gihimong medikasyon ug eksaminasyon sa susamang adlaw.
Subay niini gipahimangnoan sa maong hepe ang publiko nga kanunay mamahimong responsable sa pagpakaylap og impormasyon sanglit kini makahatag og kabalaka sa katawhan samtang nagpadayon ang imbestigasyon sa kapulisan sa Tagum aron palawman ang ubang detalye sa maong insidente.
RadyoMaN Jason Amisola
