Davao City – Nanganti karon si Davao City Police Office (DCPO) head Col. Alexander Tagum ngadto sa mga dispatcher sa dakbayan nga mamahimo kini nilang dakpan ug kasuhan og extortion.
Kini subay sa nahitabong pagpangulata sa usa ka PUJ Driver sa duha ka mga dispatcher niadtong Sabado sa kadlawon nahitabo sa Bankerohan ning syudad human nakulangan sa 10 pesos nga gihatag niini ngadto kanila.
Atol sa interbyu kang Tagum sa tulumanong Kuskos Batikos Morning Edition uban si RadyoMaN Erin Lumosbog, gibutyag niini nga ipasa niya sa intel group ug traffic group ang reklamo sa padayong pag-operate sa mga dispatcher sa managlahing dalan sa Davao.
Sa pagkakaron, saysay sa maong hepe nga nagpadayon ang pagpangita sa duha ka mga suspetsado.
Samtang nanawagan usab kini sa katawhan ilabi na sa mga driver nga isumbong gilayon kanila kung gina abusar sa mga dispatcher diha sa kadalanan.
“Kung naay mga parehas ani nga panghitabo sa inyong palibot makita ninyo palihug lang i-report dayon sa kapulisan para immediately mahatagan dayon nato og intervention ug timan-an nato nga dapat mag reklamo gayud ta kay kung walay reklamo walay kaso,” pamahayag ni Tagum.
RadyoMaN Jason Amisola
