Tagum PNP: Rigen refund malinawon

Davao City – Hapsay ang nagpadayong refund sa usa ka investment scheme nga Rigen Wellness 2.0 sa Tagum City, Davao del Norte karong adlawa, August 15, 2019.

Sa interbyu sa DXDC RMN Davao kang Police Captain Anjanette Tirador gibutyag niini nga gipahigayon ang maong aktibidad sa usa ka compound sa Mankilam, Tagum City.

Saysay ni Tirador bisan og wala nangayo og security assistance ang Rigen apan gilayong nag deploy ang Tagum PNP sa ilang pwersa human nga na-monitor kung asa ipahigayon ang aktibidad.


“Nahibal-an ang lugar so immediately niadto na dayon didto, nag deploy na dayon og personnel kay ready man ta, on alert man ang kapulisan,” saysay ni Tirador.

Gibutyag ni Tirador nga ubay-ubay usab ka mga investors ang mi-adto sa aktibidad diin buntag pa lamang gatusan na katao ang midagsa sa lugar.

“Nag abot abot mga around 10:30am, more or less mga 600 na man daw to katao ang naa sa area,” segun ni Tirador.

Gipaniguro usab sa Tagum PNP spokesperson nga igo ang pwersa sa kapulisan nga magbantay ug magmintinar hangtud nga mahuman ang aktibidad.

RadyoMaN Kirby Manzon

Facebook Comments