Davao City – Nagtanyag karon og reward ang lokal nga gobyerno sa Tagum sa bisan kinsa man nga makahatag og impormasyon sa identity sa mga suspek o responsable sa sunod-sunod nga shooting incident sa Tagum City, Davao del Norte.
Subay kini sa gipagulang pamahayag sa City Government of Tagum diin ilang gikondena ang mga insidente sa pagpamatay sa lugar ilabi na sa pagpatay sa 22 anyos nga si Judylou Palas niadtong September 4, 2019 nga giingong anak sa usa ka Marilou Tajale, kanhi agent ug cashier sa PLC investment company.
Kahinumduman nga gisulod sa balay sa Purok Dahlia, Visayan Village sa nasangpit nga syudad ang biktima ug gipusil sa wala mailhing suspek ug namatay samtang samdan usab ang 15 anyos nga igsuon niini nga si alyas Jane.
Dugang sa pamahayag sa Tagum government nga gitasahan na usab karon ang Tagum City Police Office nga masigurong madakpan ang mga responsable sa shooting incidents ingon man mabantayan og husto ang seguridad sa maong syudad.
Samtang sa pakighinabi sa DXDC RMN Davao kang Police Col. Ariel Alcala, Chief of Police sa Tagum PNP, ginamonitor nila karon ang mga aktibidad nga dunay kalambigitan sa investment schemes.
“Siguro i-monitor sila, i-verify kung unsa ilang activity. After ana og unsay dagan, i- coordinate sa right agency nga maoy naay concern ana,” segun ni Alcala.
RadyoMaN Renz Barbarona
