Davao City – Perteng hadluka sa mga estudyante ug magtutudlo sa may Sitio Tibucag, Bgry. Dagohoy, Talaingod, Davao del Norte kagahapong adlawa.
Sa video nga gipost ni Ruel Cabajar Lugatiman, makita nga nanghupo ang mga bata sulod sa classroom human nagkaengkwentro ang kasundaluhan ug giingong mga New Peoples Army (NPA).
Sa report gikan sa Police Regional office kun PRO-XI, nagka engkwentro matud pa ang tropa sa 56th IB, 7th ID, Philippine Army ug ang kapin kun kulang 20 ka mga miyembro sa gituohang sakop sa Guerilla Front 55, SRC 5.
Resulta sa maong engkwentro mao ang pagkasamdan sa usa ka sundalo nga giilang si Arjay Pascacio samtang wala pa nasuta og aduna bay samaran sa pikas pundok.
Samtang sumala ni 10th ID spokesperson Capt. Jerry Lamosao nga adunay report nga musulod ang mga NPA aron sa pagpanghasi matud pa sa tulunghaan hinungdan nga miresponde ang kasundaluhan ug napugngan ang plano.
Sa karon, naglusad na og hot pursuit operation ang kasundaluhan sa area batok sa mga NPA.
RadyoMaN Renz Barbarona
