Sa pakighinabi sa DXDC RMN Davao kang Talikala Inc. Executive Director ug Human Rights Advocate nga si Jeanette Ampog, iyang gibarogan nga angay kasohan ug di na pasayloon ang amahang namun-og ug nahimong hinungdan sa kamatayon sa anak.
Segun ni Ampog nga dili makatarunganon ang hinungdan nga nakainom o nawala sa kaugalingon maong makapasakit o makapanapat. Ug kung ugaling lango sa ilimnong makahubog, dili kini ibutang sa kamot ug ulo.
Giawhag karon sa Talikala ang mga ginikanan nga tun-an ang positive parenting ug discipline sa pagpadako sa mga bata.
Nagsumikad ang maong hisgotanan sa balitang usa ka 8 anyos nga anak sa General Santos City ang kabsan sa kinabuhi human gikulata ug gilambos sa amahan tungod matud pa nakainom kini ug ang iyang sugo wala natuman.
Subay niini pipila ka dabawenyos ug bisan ang Talikala nakaingon nga ang tanan pwedeng mahimong ginikanan apan dili tanan angayan mahimong ginikanan.
RadyoMaN Ivy Parido
