Davao City – Gi-awhag karon sa Talikala Inc. mapabata man o hamtong nga mamahimong responsable sa paggamit sa managlahing social media platforms.
Sumala ni Talikala Inc. Executive Director Jeanette Ampog atol sa interbiyu kaniya sa Straight to the Point, giingon niini nga gikinahanglan masayod ang usa ka user kung anaa na ba sa kategoriya nga law-ay o nindot ba kung lantawon ang ilang content nga i-post online.
“Dapat aware ta kung boundary na ba siya sa malaw-ay o nindot. Importante ang mugamit sa TikTok ma-educate on responsible use of social media platforms,” segun ni Ampog.
Matud pa duna kini nakita nga problema sa content sa pipila ka users sama sa giingong ‘invisible challenge’ gani miresulta kini sa abuso sa parehong batan-on ug hamtong nga users.
“Naay responsibilidad pod ang TikTok nga kung dunay mga boundary na sa pornographic content dapat naa pud sila’y klaro nga guidelines ug mga mechanisms kanang pwedi na i-blur or i-censor na,” segun ni Ampog.
Tambag niini nga pwedeng gamiton ang social media platforms sa atong adbokasiya ingon man maka-inspire sa uban.
“Ang social media platforms can advance our advocacy, our campaigns and our cause but it can also used to exploit and abuse people,” dugang niini.
RadyoMaN Jason Amisola
