Nagpagawas ug kamanduan si Bukidnon Governor Jose Ma. R. Zubiri Jr., pinitsahan Hulyo 8, 2020 nga temporaryong gisuspendi ang tanang matang sa dagkong panagtigum apil na ang “People’s Day o Adlaw sa Masa” sulod sa kapitolyo probinsyal.
Gisuta niini nga ang mao nga lakang, tungod kini sa kalit nga pagsaka sa kumpirmadong kaso sa COVID-19 sa probinsya mga miabot na sa 44 as of Hulyo 8, 2020.
Mahinumduman nga kaniadto aduna lamay tulo ka kaso sa COVID-19 sa Probinsya sa Bukidnon apan human sa pagdawat sa sobra sa kuatro mil ka mga Returning Overseas Filipinos (ROFs) og Locally Stranded Individuals (LSIs), ang numero niabot na sa 40 kapin ug adunay pagdugang pa matag adlaw.
Tungod niini, wala matud pay kapilian ang gobernador kun dili paga suspendihon ang dagkong panagtapok sulod sa kapitolyo aron ma proteksyonan ang tanang katawhan sa Probinsya sa Bukidnon.
Samtang as of July 10, 2020, natala ang 46 ka total confirmed case sa COVID-19 sa probinsya sa Bukidnon
Sa mao nga ihap, 4 ang admitted, 33 ang out-patient, 9 ang naka-rekober samtang walay namatay.
