General Santos City—Gideklarang Dead on arrival sa Dr. Jorge Royeca Hospital ang usa ka Sarif Alba, 20 anyos, ulitawo, nga taga Purok Saludin, Barangay Labangal, Gensan kansa napusilan sa mga Pulis human nisukol atol sa gipahigayong buy-bust operation sa area sa Purok San Francisco, Barangay Lagao, Gensan alas 8:10 ang takda kagabie.
Gipangunahan sa Station Drug Enforcement Unit sa Police Station 6 ang maong operasyon inabagan sa City Police Drug Enforcement Unit ug PDEA-12 ang maong operasyon nga misangko sa kamatayon sa suspek.
Nasayran nga una nang nakadawat ug report ang kapulisan bahin na sa iligal nga gimbuhaton sa suspek mao nga gipahigayunan ug operasyon.
Subay sa report sa Police Station 6, Pag-abot sa lugar nakamatikod matud pa ang suspek, nga mga Pulis ang iyang katransaksyon mao nga nibunlot kini ug pusil ug gipabuthan ang kapulisan mao nga wala silay mahimo kon dili ang pagbalos ngadto sa suspek.
Nakaangkon ug mga samad sa dughan ang suspek nga hinungdan sa iyang kamatayon.
Narekober sa lugar ang usa ka unit sa homemade .38 revolver nga walay serial number, upat ka buhing bala, duha ka empty shell, 7 ka sachet sa gituohang shabu ug marked money nga P500.00.
