General Santos City–Dead On Arrival sa balay tambalanan ang target sa buy-bust operation human kining misukol sa operatiba alas 6:00 pasado ang takna sa gabii sa Purok Carcon, Brgy. Lagao ning dakbayan sa Gensan.
Giila ni Police Lt. Omar Baret, Deputy Station Commander sa Police Station 6 ang suspek nga si Guinda Amil Guiamal, hamtong ang pangidaron nga residente sa maong lugar. Nakamatikod matud pa ang suspek nga pulis ang iyahang ka-transaksyon hinungdan nga mibunlot kini ug armas, ug gipabuthan ang operatiba.
Nakuha gikan sa posisyon niini ang usa ka kalibre 38 nga armas ug mga sachet sa gituohang shabu. Dugang pamahayag ni Lt. Baret, anaa sa watchlist sa Police Station 6 ang suspek ug ginagamit niini ang iyahang tricycle sa paghatud sa iyang ginabaligya nga illegal nga droga.
Sa karon, ilaha pang ginasuta kung miyembro sa usa ka organisadong grupo ang suspek apan naka-abot matud pa kini sa Barangay Labangal sa pag-pamaligya ug illegal nga droga lakip na sa merkado publiko. (LVR)
