Subling gisiguro sa Task Force Bangon Marawi (TFBM) nga matapos ang rehabilitasyon sa Marawi City sa dili pa mahuman ang termino ni Presidente Rodrigo Duterte sa sunod nga tuig.
Kini ang gipasalig sa TFBM human ang State of the Nation Address o SONA sa Presidente niadtong nakalabay’ng bulan, nga nagmando sa pagpadali sa rehabilitasyon sa Marawi human kini maguba tungod sa lima ka bulan nga giyera batok Dawlah Islamiya niadtong tuig 2017.
Sumala ni Housing Secretary ug TFBM Chairman Eduardo Del Rosario, kauban nila ang 56 ka mga ahensiya isip partners sa pagtrabaho sa mga major infrastructures sa Marawi busa kampante sila nga matapos kini sa gitakda nga panahon.
Matud ni Del Rosario nga 70% ngadto na sa 75% ang natapos sa maong mga proyekto ug sa Disyembre, mas madugangan pa kini nga accomplishment base sa nakalatid sa development plan.
Miabot na sa 279 ka mga permanent shelters ang na-turn over ngadto sa mga benepisyaryo sugod niadtong Pebrero ug duha ka mosque na sulod sa most affected area ang gi-inagurahan human matapos ang pag-repair.
Dugang housing units ang i-turn over karong bulan sa Agosto ngadto sa mga residente nga dili na makabalik sa ilang kanhi gipuy-an tungod kay gideklara na kini sa gobyerno nga “no build zone” o kaha “danger zone”.
Nagpadayon karon ang pagtrabaho sa permanent shelters ug road networks nga dunay underground utilities, solar lamps ug traffic lights.
Kung matapos, mao na kini ang signal sa pagbalik sa mga residente nga naa sa Sectors 4 ngadto sa 7.*
