Davao City – Hingpit na gisugdan sa Special Investigation Task Force ang parallel investigation labot sa kamatayon ni Dennis Denora, publisher sa Trends and Time Newspaper nga nakabase sa panabo city davao del norte.
Niadtong adlaw’ng Biyernes sa miaging semana nagtagbo ang mga sakop sa Task Force Dennis Denora sa pagpanguna sa CIDG ug gihisgutan ang dagan sa imbestigasyon sa kamatayon ni Denora.
Sumala ni PRO 11 Spokesperson Police Chief Inspector Milgrace Driz, nangalap na og dugang ebidensiya ug testimonya ang Task Force aron masuta ang ugat hinungdan sa pagpusil patay kang Denora.
Nasayran nga sagad unod sa mantalaan ni Denora pulos hisgutanang politika mao nga dako ang pagduda sa uban nga dunay sambog politika ang pagpatay sa publisher.
Ang pasangil nga dunay kalambigitan si House Speaker Pantaleon Alvarez sa kamatayon ni Denora hugot na kini gihimakak sa opisyal.
Segun ni Driz, pipila sa gilantaw nga anggulo mao ang personal grudge, ug sa trabaho diin mibalibad una – ang opisyal kung may kalabutan ba sa politika sa Davao del Norte ang motibo sa pagpatay kang Denora.
Matud sa tigpamaba nga gilaraw karon sa Task Force nga makig-istorya sa pamilya ug maingon man sa mga kahigala sa pamasin nga makakuha sila og mahinungdanong impormasyon.
Hangtud karon, wala pa makaporma og cartographic sketch ang kapulisan sa dagway sa riding in tandem sa mipusil patay kang Denora.
Apan ang gibilin nga pamilya ni Dennis Denora hugtanon misandig sa pagsalig ngadto sa kapulisan nga mahatagan og hustisya ang kamatayon sa publisher.
Samtang pikas bahin, hugot gikondena ni KBP Davao City Chapter President Roy Geonson ang pagpatay kang Denora diin misaad kini nga iyang buhaton ang tanan aron matabangan ang pamilya sa pagkab-ot sa hustisya.
Masaligon si Geonson nga nagpabiling luwas ang Pilipinas alang sa mga tigbalita bisan og miabot na sa dose ka media practitioner ang gipatay ilawom sa administrasyon ni Duterte.
RadyoMaN Joel Viray
