Davao City – Gilaraw karon sa Panabo City PNP nga magtukod og Special Investigation Task Group aron mututok sa imbestigasyon sa pagpusil-patay kang Davao del Norte media man Dennis Denora nahitabo sa Century Bank, National Highway, Brgy New Pandan, Panabo City.
Segun ni P/Chief Inspector Frederick Deles ang Deputy Chief of Police sa Panabo PNP nga posibleng may kalambigitan sa trabaho ug personal nga bangi ang gilantaw nila nga anggulo sa pagpusil patay sa biktima.
“Usa ka anggulo nga among ginatan-aw karon sa iyang trabaho kay basin naa siyay naigo kay naa siya sa print media maong mag-request mi og copy sa series of issues sa iyang newspaper, kay naa pod syay radio program, aron masuta namo kung hardhitting ba siya o kuan ba naa ba syay nasami,” segun ni Deles.
Sumala ni Deles nga sa ilang mas gipalawmang imbestigasyon nangalap sila og dugang saksi ug mga ebidensya aron makatabang sa pag-ila sa mga suspek.
“Amo pang ginatan-aw karon sa CCTV sa Century Bank kay naa man guy istorya nga ang nagtira nagsakay og motor ug naa puy nag-ingon nga nagbaktas siguro ninaog sa motor,” matud ni Deles.
Gitataw ni Deles nga base sa ilang interbyu sa ilang imbestigador sa driver sa biktima nga si Mayonito Revira nga walay gibutyag kaniya ang biktima una pa man nahitabo ang insidente kung aduna kiniy nadawat nga hulga.
“According sa iyang driver kay 3 years naman daw to ga-drive sa iyaha wala man daw naka-mention sa iyaha nga naa syay threat kay syempre kung driver nimo syempre concern ka muingon gyod ka sa imong driver nga magbantay ta ha kay naa koy threat pero wala man gyod daw niingon sukad,” matud ni Deles.
Gibutyag ni Deles nga nagbutang usab sila og pulis kinsa mubantay sa driver sa biktima kinsa padayon pang nagpaalim sa ospital human nakahiagom usab og samad sa kamot atol sa insidente.
Sumala ni Deles nga andam sila nga magpadala og mga personahe kung mag-request man og seguridad ang pamilya sa biktima.
RadyoMaN Aimee Guinita
