Nagpahimangno ang Task Force Valencia nga naglangkob sa Philippine National Police, City Traffic Management, ug Local government unit ngadto sa publiko nga padayon ang ilang pagpatrolya panahon sa curfew hour.
Sa interview sa RMN DXMB Malaybalay ngadto kang Atty. Genaro Cadigal Jr,. ang city administration sa siyudad sa Valencia gibutyag niini nga padayon ang ilang pag-roving sa curfew bisan pa man sa adjustment nga gipatuman sa kagahamhanan sa mao nga dakbayan tungod sa nagsingabot nga kapiyestahan.
Nasayran nga gikan sa alas 11 sa gabie gisubong ngadto sa alas una sa kadlawon hangtod alas 4 sa kadlawon ang gipatuman nag curfew gikan Agosto 1 hangtod Agosto 31 ning tuiga subay sa kamanduan nga gipanakanaug ni Mayor Azucena Huervas.
Matud ni Atty. Cadigal, nga dili mamahimong i-pull out ang tropa aron dili mahatagan ug tsansa ang mga dautang elemento nga muhimo ug krimen.
Gipasigarbo pa niini nga tungod sa gipatuman nga curfew sa mao nga dapit, dako kaayo ang pag-ubos sa kriminalidad.
Gipahayag usab niya nga sa mga nakalabay nga mga tuig nakatala ug pagtaas sa ihap sa kriminalidad ang siyudad panahon sa kapiyestahan.
Sa karon hugot nga seguridad ang gipatuman sa dakbayan tungod sa nagsingabot nga fiesta.
