Davao City – Gilaraw karon sa lokal nga konseho sa dakbayan sa Davao nga
magmugna og usa ka task force aron maoy magimbestiga sa mga iligal nga
resorts nga ga-operate sa Marilog District, Davao City.
Segun ni Councilor Al Ryan Alejandre, chair sa tourism and beautification
committee nga langkuban ang maong task force sa Business Bureau, City
Planning and Development Office, City Treasurer’s Office, City Engineer’s
Office, Department of Environment and Natural Resources, National
Commission on Indigenous Peoples (NCIP) ug mga barangay officials.
Gibutyag ni Alejandre nga duha lang sa 29 ka mga establisyemento sa Marilog
ang adunay business permits, ang Seagull Mountain Resort ug Hill 88
Hideaway.
Sumala ni Alejandre nga gipahibalo kaniya sa City Treasurer’s Office nga
sagad sa mga hulagway sa mga resorts nga nga anaa nahimutang sa Marilog
wala nakarehistro sa Business Bureau.
Gipasalig sa konsehal nga ilang aksyunan ang maong isyu kay labing
maapektuhan niini ang kita sa ekonomiya sa lungsod kay padayon ang
pagdaghan sa ihap sa mga turista nga gadagsa sa mga iligal nga mga mountain
resorts nga nahimutang sa danger zones base sa Mines Geosciences Bureau
(MGB) 11.
Dugang niini nga ila pang sutaon kung unsa nga mga establisyemento ang
namuntar gawas sa tourism development zones ug sagad niini nga ancestral
domains diin wala kini pagtugot gikan sa mga tribal leaders.
Kahinumduman, gimanduan ni Davao City Mayor Inday Sara Duterte- Carpio ang
City Administrator Office ug City Environment and Natural Resources Office
kalabot sa daghang mga iligal nga ga-quarry ug mga balay pamatigayon nga
gapadagan nga walay lisensya ug mga permits.
RadyoMaN Aimee Guinita
