Makato, Aklan – Tama it pag eabo sa ueo rong naangkon it tatay matapos linabo it sariling unga ko Sabado it gabii sa Brgy. Cabatanga, Makato, Aklan.
Rong biktima nakilaea kay Felix Teofilo Cawaling, 64-anyos samtang rong suspek nakilaea kay Joey Cawaling, 31-anyos, parehong residente it nasambit nga lugar.
Base sa report nga parehong hilong rong mag-ama ag nakaangkon it diskusyon ag uwa pagka intindihanan nga ko ulihi hay umabot sa pag eabo ko suspek sa tatay.
Insigida nga gindaea sa hospital rong biktima para mataw-an it nagakaigo nga pagbueong samtang rong suspek hay insigida man nga gindaea sa Makato PNP.
Sa ginpatigayon nga pag istorya nagpahayag rong pamilya nga indi eon sanda magpasaka it kaso kuntra sa suspek pero may kasugtanan nga indi eon raya mag istar sa sa andang baeay.
