Tapaz, Capiz – Patay ang tatlo ka mga mag-ulutod matapos malumos sa isa ka dam sa Barangay San Antonio Tapaz, Capiz sang nagligad nga adlaw. Ginkilala ang mga biktima nga sanday Princess, 12-anyos, Lycel, 14-anyos kag Leah Pascua, 15-anyos lunsay residente sang Barangay San Julian sang nasambit nga banwa.
Sa imbestigasyon sang Tapaz PNP nagpadulong ang mga mag-ulutod sa nasambit nga dam kaupod sang ila mga pakaisa agud mamunit sang mga isda. Nagkasugot ang mga ininga maglangoy, apang dimalas nga nakadanlog si Princess rason nga ginluwas ini sang iya duha ka mga magulang. Bangud sang kadalum sang tubig, wala na nakabutwa ang tatlo ka mga biktima.
Matapos ang isa ka oras nga pagpangita, wala na sang kabuhi sang masapwan ang mag-ulutod. Gintinguhaan pa nga madala ang tatlo sa ospital apang gindeklarar ang mga ini nga dead on arrival sa ospital.
