Cuartero, Capiz – Patay ang tatlo ka mag-utod nga mga trabahante sang SDB Construction matapos nga nahubsan ang mga ini sang hangin samtang yara sa sulod sang underground water tank sa Maindang Senior High School sa Brgy Maindang, Cuartero, Capiz.
Ang mga biktima ang lunsay mag-ulotod kag ginhingalanan alyas “Dodong’ “Joson” kag “Kano Vargas” nga pareho mga residente sang Brgy Majanlud, Sapian, Capiz kag naga-obra gid lamang sa nasambitan nga eskwelahan.
Suno sa project supervisor nga si Nick Roxas, nagapatigayon ang mga ini sang clearing kag pagpanglimpyo para sa turn- over ceremony buwas nga adlaw sa bag-o construct nga K-12 building.
Base sa inisyal nga impormasyon, una nga nagpanaog ang biktima nga sa “Dodong Vargas” sa nasambitan nga underground water tank agud nga magpanglimpyo kag magkuha sang pormas apang ini ang nalipong. Gintinguhaan nga salbaron siya sang duha sini ka utod apang mangin ang mga ini ang nalipong man kag ginbawian sang kabuhi.
Suno naman sa isa sa mga kaupdanan nga si Raffy Bellosillo sang Poblacion, Ivisan, Capiz, nakasimhot ini sang tuman ka lain nga klase sang baho kabangdanan nga wala ini magdayon sa pagpanaog sa tangke.
Ang bangkay sang tatlo ka mga biktima ang yara na sa Galino Funeral Home sa Poblacion Takas Cuartero Capiz.
