CAPIZ – Patay ang tatlo ka mga katapo sang New Peoples Army sa nagluntad nga engkuwentro sa tunga sang 61st Infantry Battalion-Charlie Company, Philippine Army kag NPA sa Sitio Tigpaka Dako, Brgy. San Antonio Cuartero Capiz, alas 3:00 kahapon sang hapon. Nagluntad ang engkuwentro sa isa ka talamnan sang mais, sa mabukid nga bahin sang nasambit nga lugar kun sa diin nagdugay sang masubra sa tatlo ka oras ang pagbayluhanay sang lupok.
Ginpahayag ni anay SB member Abner Falcis, ginkilala ang mga napatay nga sanday Federico Diaz alyas Ka Val sang Brgy. Mahabang Sapa, Cuartero, Capiz, Felizardo Lumawod Cerilo alyas Ka Bong, residente sang Brgy. Pinay, Mambusao, Capiz at Ka Remie Berayi sang Brgy. Baldoza, Lapaz, Iloilo City. Nag-angkon san madamo nga igo sang bala sa ulo kag nagkalain-lain nga bahin sang lawas ang mga napatay nga rebelde.
Suno sa militar na-recover sa ginluntaran sang sang engkuwentro ang duha ka mga armas luthang nga Ak 47 kag m16 rifle, isa granada, mga magazine kag madamo nga bala. Subong nga hapon, ginkuha na sang Cuartero PNP, kaupod ang SOCO, MDRRMO kag Philippine Army ang mga bangkay kag gindala sa isang punerarya agud ipaidalom sa post-mortem examination kag paraffin test.
Ginpahayag nga ang mga napatay nga rebelde, lunsay mga opisyal sa idalum sang Nonito Aguirre, Sr. Command sang New People’s Army – Eastern Panay. Madugay na nga ginabantayan sang militar ang grupo ni Ka Val, antes ginkasa ang operasyon batuk sa nasambit nga grupo. Wala man sang may gin-report nga napatay ukon napilasan sa mga katapo sang Philippine Army.
(c) RadyoMan Jessie LLegue Mendoza
