Tatlong lalaki ang naaresto matapos mahuli sa aktong nagsusugal sa bayan ng Aringay, La Union, hapon ng Pebrero 25, 2026.
Isinagawa bandang alas-tres ng hapon ang operasyon ng mga tauhan ng Aringay Municipal Police Station bilang pagpapatupad ng Municipal Ordinance 182 series of 2015 o Anti-Illegal Gambling Ordinance.
Nahuli sa akto ang mga suspek na kinabibilangan ng isang 45-anyos na negosyante, 43-anyos na walang trabaho, at 39-anyos na self-employed. Lahat ay pawang mga residente ng nasabing bayan.
Ayon sa pulisya, nadatnan ang mga ito na naglalaro at tumataya sa larong “Tong-its.” Nakumpiska sa kanila ang isang set ng baraha at perang pantaya na nagkakahalaga ng ₱412 sa iba’t ibang denominasyon.
Kasalukuyang nasa kustodiya ng Aringay MPS ang mga naaresto kasama ang mga nakumpiskang ebidensya para sa kaukulang disposisyon.
