Patay ang tatlong lalaki na nagholdap sa isang UV express sa Novaliches, Quezon City.
Batay sa ulat ng pulisya, nakatanggap sila ng report na may tatlong lalaking nangholdap sa mga pasahero ng isang UV express sa bahagi ng Barangay San Bartolome sa Novaliches.
Tinangay ng mga suspek ang personal na kagamitan ng mga pasahero tulad ng cellphone, pera at laptop.
Sa pagmamadaling umalis, naiwan ng mga suspek ang isang motorsiklo sa lugar.
Tumakas ang mga suspek sakay ng isa pang motorsiklo papunta sa direksyon ng Barangay Gulod.
Inabutan ng mga pulis ang mga suspek sa lugar at nagpaputok ang mga ito ng baril.
Dito na gumanti ng putok ang mga pulis na nagresulta sa pagkakapatay sa tatlong suspek.
Nakuha sa lugar ang isang kalibre .45, isang kalibre .38, isang motorsiklo, mga cellphone at iba pang gamit ng mga pasahero ng UV express.
