Arestado ang tatlong menor de edad matapos pagnakawan ang isang bahay sa Brgy. District 1, Cauayan City.
Kinilala ang biktima na si Jose Rivera, singkwentay kwatro anyos, may asawa at residente sa nasabing barangay habang ang tatlong menor de edad naman na suspek ay itinago sa alyas na Bong-bong, Jek-jek at Jojo.
Batay sa pagsisiyasat ng PNP Cauayan, una umanong nagising ang anak ni Rivera at sinabing nawawala ang kanilang mountain bike.
Napag-alaman naman ng biktima na nawawala ang specialized mountain bike na nakalagay lamang sa sala ng kanilang bahay.
Nakumpirma rin ni Rivera na nawawala ang kaniyang pitaka na naglalaman ng Php22,000 maging sa kaniyang isa pang pitaka na naglalaman ng Php16,000 at ang kaniyang drivers licence, Comelec ID, LGU ID, isang unit ng cellphone, isang mamamahaling relo at susi ng kanilang motorsiklo.
Samantala sa tulong ng mga nakakita ay nadakip ang mga suspek sa pagnanakaw na nasa kustodiya na ng kapulisan at hawak na ng Womens and Childrens Police Desk o WCPD ang kanilang kaso at nakatakdang ipapasakamay sa DSWD.
