Davao City – Padayun pang ginaimbetisgahan sa kapulisan sa Talomo ang motibo sa pagpusil-patay ngadto kang Patrick Jay Gudes, 34-anyos, usa ka tattoo artist nga nagpuyo sa may Doña Rosa, Toril ning siyudad.
Base sa report, bandang alas-9:10, Martes sa gabii, samtang naglakaw ang biktima sa may dalang San Miguel, Matina Aplaya ning siyudad gisundan kini sa usa ka wala mailhing suspek sakay sa usa ka pula nga XRM nga walay plaka dayon gipusil sa tulo ka higayon ang biktima.
Human sa panghitabo dali nga misibat ang suspek padulong sa Kawayan Drive Matina.
Daling gitabang sa Rescue Central 911 ang biktima ug gidala sa pinakaduol nga hospital.
Sa karon nagpadayon ang imbestigasyon ug gikuhaan na og testamento ang kabanay ug higala sa biktima nga posibleng maghatod sa pagkaila ingon man pagka sikop sa suspek.
RadyoMaN Paul Canono
