Davao City- Aron hingpit masirad-an ang isyu kun sakop ba o dili sa Triad kun Chinese syndicate si Vice Mayor Paolo Duterte nga gi-alegar ni Senador Sonny Trillanes atol sa ikapito nga pagdungog sa 6.4 billion shabu shipment sa blue ribbon committee sa Senado, mas maayo ipakita sa publiko ang Tattoo sa bise mayor.
Kini ang pag-awhag ni CAMACOP Minister Reverend Ronaldo Ombis kang Vice Mayor Pulong nga ipakita na lang sa publiko ang tattoo nga gipunting ni Trillanes sa Senado sa ingon moguwas nga naghimo ra og istorya ang senador batok sa presidential son.
Hugot gisupak ni Reverend Ombis ang katarungan sa uban nga basin masupak ang pribadong katungod ni Vice Mayor Pulong ugali ipakita niini ang tattoo nga giinitan ni Trillanes sa nakalabay’ng imbestigasyon sa Senado.
Alang kaniya, kung dili lang magduha-duha sa pagpakita ang Bise Mayor sa iyang tattoo mawala ang pag-duda sa uban nga siya sakop sa Triad ug ang ma-ulawan mao si Trillanes kay namahid kini og lapok bisan og limpyo ang anak sa presidente.
Matud pa sa Minister sa Christian and Alliance Churches of the Philippines Metro Davao District kung dili buot ni Pulong nga makita ang iyang tattoo, magpili na lang kini og kasaligan ug maoy patan-awon ug dayon mag-anunsyo sa publiko kung sign ba sa triad o dili ang iyang tattoo.
Mituo si Reverend Ombis nga mao kini ang labing maayo nga paagi aron matiklupan ang pasangil ni Trillanes nga miyembro sa Chinese Syndicate si Pulong ug nalambigit kini sa shabu shipment gikan China nga nakalusot sa BOC.
Sa katapusan, gitugyan na lang ni Reverend Ronald Ombis sa Ginoo ang estilo ni Trillanes ug tugutan nga ang Dios na mupagawas sa kamatooran labot sa mga alegasyon sa senador batok sa pamilyang Duterte.
Kasamang Joel Viray
