Davao City – Gianunsyo ni Davao City Mayor Sara Duterte nga magpadayon gihapon ang libreng konsultasyong medikal pinaagi sa telemedicine nga Tawag Kay Doc.
Sa programang Straight to the Point sa DXDC, gibutyag sa mayor nga adunay mga volunteer doctors nga buot gihapong muhatag sa ilahang libreng serbisyo ngadto sa mga nanginahanglan.
“Nagistorya mi ni Doctor Tesoro, nagatabang sa atoa sa City Government, regarding sa Tawag ni Doc. Ingon siya nga adunay volunteer doctors nga gusto magpadayon gihapon karon ang Tawag ni Doc, naa gihapon tay online tele-consultation para sa mga taong nanginahanglan,” segun ni Tesoro.
Sumala sa mayor mamahimong mutawag lang sa Davao City Central 911.
Gipadangat usab sa mayor ang iyahang pasalamat sa 150 volunteer doctors nga gilangkuban sa internists, pediatricians, EENT (Eye Ear Nose and Throat) ug obstetricians gikan sa Southern Mindanao Chapters of Philippine College of Physicians (PCP) ug Philippine Pediatric Society (PPS) sa sobra 3 ka bulan nga pag serbisyo sa mga Davaoeños diin nakaakomodar sila og sobra 12,000 ka mga tawag sa telemedicine.
RadyoMaN Aimee Guinita
