Tawas Kitaotao Bukidnon ‘killing’ gihusay

473

Davao City – Aron hingpit nga masolusyan ang problemang nahitabo sa Tawas,Kitaotao Bukidnon diin duha ka mga kinabuhi ang nakalas nagpadayon ang gihimong paghusay sa Tribal Council of Leaders ug mga Barangay officials sa maong lugar.

Sa interbyu sa RMN Davao kang Bae Magdalena Herbillo ang Municipal Tribal Chieftain ug IPMR sa Brgy. Sumalili sa Arakan Valley, North Cotabato nga nilingkod ang mga opisyales uban ang mga hingtungtan sa mga namatay sa maong lugar.

Gipasabot sa Tribal chieftain nga nahitabo ang pangayaw human nga usa ka membro sa Tribung Matigsalug ang napatay niadtong Setyembre 30 sa diskuhan sa may Brgy. Tawas nga si Arug Kalimpit nga taga-Barangay Sinuda, Kitaotao, Bukidnon.

Nunot sa maong insidente buot manimalos matud pa ang mga ka-tribu niini tungod sa kamatayon sa ilang kabanay.

Gikumpirma ni Herbillo nga namatay atol sa nahitabong ‘pangayaw’ sa Tawas, Kitaotao Bukidnon niadtong Oktobre 1 si Dolfo Handomon.

“Nahitabo na man ang nahitabo dili unta na kini mausab pa kay kinahanglan ang mga managsilingan nga barangay adunay panaghiusa ug pagsinabtanay. Gi-convince namo ang mga taga-Barangay Tawas nga magtinabangay sa maong problema, mag-amot amot sa butang, kabayo o unsa pa man para ma-settle lang ang problema,” sumala niini.

Nanghinaot kini human sa insidente matunhay na ug mabalik na sa normal ang kahimtang sa ilang dapit.

“Sa akoang kabahin nga dili na gyod ipadayon kay kung naay mga problema sa katawhan lingkuran dili iagi sa pagpangayaw,” sumala niini.

Nanawagan karon sa publiko si Herbillo nga undangon na ang pagpakatag og maling impormasyon sa social media kalabot sa giingong adunay pangayaw sa Buda kay nakahatag kini’g kahadlok sa katawhan.

“Dili magsige og magpalapdag anang facebook sobra sobra na kaayo. Katong tinuod lang atong ipalapnag kay maka-rattle ug maka-panic sa mga katawhan. Akong panawagan nga unta ang katong mga isyu nga adunay mga mangayaw nga undangon na unta na kay makadamay sa mga tao nga wala nagbuhat og mga dautan.”

”Ang eskwelahan sa Buda wala nay klase, sa Tawas wala nay klase, sa Sinuda walay klase ug hangtod sa Sumalili nga barangay walay klase. Ang mga tao dili na makaadto sa ilang uma kay nangahadlok na ug ang ilang hayop napasagdan na ug bisan pa gani sa ilang gulayon nga ilang panginabuhi dili na sila maka-harvest tungod kay nangahadlok na sila,” matud niini.

Subay niini sa post sa LDRMM Arakan sa Facebook gibisita ni Arakan Mayor Rene Rubino uban ang mga taga lokal nga panggamhanan, kapulisan, kasundaluhan ug uban pa ang mga apektado para tunulan og ayuda ug solusyunan ang problema sa maong lugar.

“Hon.Mayor Rene V. Rubino personnally assessed the situation of the IDPs at Barangay Sumalili due to Pangayaw…After the assessment, provision of relief goods followed. He ensured that conflicts was settled and IDPs were able to return to their respective homes before leaving the area.”

RadyoMaN Aimee Guinita

Facebook Comments