Davao City-Naharang sa kapulisan ug kasundalohan ang usa ka taxi driver human nakuhaan ug shabu alas 3:00 sa hapon kagahapong adlawa atol sa gilusad nga joint operation sa pagpanguna ni Police Chief Inspector Estrello Ramiso sa may checkpoint sa Licanan Barangay Lasang Bunawan District ning dakbayan.
Subay sa report gikan sa Bunawan PNP, naila ang suspetsado nga usa ka Ferdinand Tayo Magallanes, 40 anyos nga taga-Purok 2 Punta Dumalag Matina Aplaya ning dakbayan.
Matud pa, sa dihang gipahigayon sa mga pulis ang inspeksyon sa mga pasahero, nadakpan ang naasoy’ng taxi driver gikan sa Tagum city padulong ning syudad . Na-rekober sa kapulisan ang usa ka gamay’ng sachet nga gituohang shabu sulod sa pitaka ni Magallanes.
Daling gisikop ang suspetsado ug banlug na kini sa selda sa kapulisan sa Bunawan ug gihikay na ang kasong kalapasan sa Republic Act 9165 kun Comprehensive Dangerous Drug Act Of 2002.
Gikanayun ni Ramiso nga anaa na sa onse ka mga drug pusher ang na-intercept gikan sa milabay’ng bulan hangtod karun bulan sa Agosto. Dugang pa niini, hugot ug padayun ang kampanya batok sa droga sa iyang area of responsibility.
Kasamang Don Pulayao
