Davao City – Gilimod sa usa ka taxi driver nga na hit-and-run niya ang usa ka miyembro sa City Transport and Traffic Management Office kun CTTMO kaganinang buntag sa Bankerohan ning syudad sa Davao.
Sa pakighinabi sa DXDC News team kang Dario Simborio, driver sa Misis Cab ug dili sa Maligaya Taxi nga gisulayan niya og hangyo ang traffic enforcer nga giilang si Julius Raquel, sakop sa CTTMO aron dili isyuhan og citation ticket tungod sa wala pagsuot og seatbelt.
Saysay sa driver nga wala niya nahangyo ang traffic enforcer hinungdan nga nagkabayloay sila og storya kalabotan sa pagbilin sa taxi sa nasangpit nga lugar apan wala misugot ang sakop sa CTTMO.
Dugang sa driver nga mibalik siya og sakay sa taxi apan wala siya kabantay matud pa nga migunit sa taxi si Raquel sa dihang gipaandar ang sakyanan hinungdan nga naguyod kini ug nakaangkon og mga pangos apan iyang giklaro nga wala niya gi-hit-and-run tungod wala niya kini nabanggaan ug gigarahe lang niya ang taxi dayon miadto sa Talomo PNP aron mu-surrender.
Kahinumduman nga sa bahin ni Raquel nga iyang gipara diha sa Bankerohan ang taxi driver aron isyuhan og citation ticket apan nagdumili kini sa pagsurender sa iyang lisensya.
Sa karon balhug na sa prisuhan ang taxi driver ug mag atubang og kasong direct assault.
RadyoMaN Renz Barbarona
