Nagsagawa ang Ilocos Center for Health Development, sa pamamagitan ng Tuberculosis Control Program, ng TB Active Case Finding (ACF) activity sa Dagupan City Jail noong Marso 24, 2026 bilang bahagi ng nationwide ACF activities kaugnay ng paggunita sa World TB Day.
Layunin ng aktibidad na matukoy nang maaga ang mga kaso ng tuberculosis, lalo na sa mga high-risk setting tulad ng mga pasilidad ng kulungan kung saan mas mataas ang posibilidad ng hawahan dahil sa siksikan at limitadong espasyo. Sa isinagawang screening, sumailalim ang mga Persons Deprived of Liberty (PDLs) sa pagsusuri upang agad na matukoy ang mga may sintomas at mabigyan ng kaukulang aksyon.
Kabilang sa mga isinagawang hakbang ang symptom screening, health assessment, at agarang referral ng mga pinaghihinalaang kaso para sa confirmatory testing at gamutan. Layunin nitong masiguro na ang mga matutukoy na may sakit ay agad na mabibigyan ng tamang lunas at hindi na makahawa pa sa iba.
Bahagi rin ng aktibidad ang pagbibigay ng impormasyon ukol sa tuberculosis, kabilang ang mga sintomas, paraan ng pagkalat, at kahalagahan ng maagang pagpapatingin at tuloy-tuloy na gamutan. Sa ganitong paraan, inaasahang tataas ang kamalayan ng mga PDL at jail personnel sa pag-iwas at pagkontrol sa sakit.
Sa pamamagitan ng ganitong inisyatibo, patuloy na pinaiigting ng mga awtoridad sa kalusugan ang kanilang kampanya laban sa tuberculosis, lalo na sa mga lugar na may mataas na panganib, upang maprotektahan hindi lamang ang mga nasa loob ng pasilidad kundi pati ang mas malawak na komunidad. | 𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
