Davao City – Sa obserbasyon sa United Leader Advocators of Davao Del Norte Kabataan, ang naghatag og nag-unang suliran sa mga kabataan mao ang modernong teknolohiya karon.
Ang modernong teknolohiya miguba sa maayong pamatasan sa kabataan karon diin sagad kanila gahi’g ulo ug musukol sa mga ginikanan hatud sa impluwensiya sa teknolohiya, segun ni Dr. Faith Prieto.
Mao usab kini ang namatikdan ni Bishop Dr. Ariel Coleto kinsa founder sa Brethren Evangelical School of Theology nga ang teknolohiya midaut sa maayong pamatasan sa mga bag-ong tubo karon.
Kung badlungon man ang mga kabataan karon kana tungod pakyas ang mga ginikanan sa ilang obligas-yon ug responsibilidad sa pagdisiplina ug pagmatuto sa ilang mga anak, sumala ni Coleto.
Sa tan-aw pa sa obispo, wala na mapraktis ang ‘parental authority’ sa mga ginikanan karon ug gani dag-han sa mga inahan ug amahan karon daug ug under dog sa ilang mga anak.
Gipasabot ni Coleto nga daan nang gitagna sa Balaang Kasulatan nga muabot ang panahon nga makigbatok ug mawala ang paghigugma sa mga kabataan karon ngadto sa ilang mga ginikanan.
Nahitabo matud pa kini tungod sa kadautan sa kalibutan karon kansang migapos ug miputos sa tibuok pagkatawo sa mga millennial karon.
RadyoMaN Joel Viray
