Davao City – Dagha’g mga rason ang nakaapekto sa kinaiya sa mga kabatan-onan sa kasamtangan kung itandi sa milabay’ng mga panahon.
Sumala pa ni Kenneth E. Tagaro, usa ka batan-on ug chairperson sa Youth for Peace Eastern Mindanao Council, gisaysay niini nga daw nahimong sayon na lamang alang sa mga batan-on ang pagkab-ot sa mga butang nga ilang gusto sa pagkakaron labi sa modernong panahon.
“Ang atong mga batan-on karon, easy go lucky na lamang tungod kay ma provide naman halos ang panginahanglan nila isip usa ka batan-on dinha sa ilang ginikanan lakip na sa nakapalibot sa ilaha most particular sa mga bisyo mao nang musantop sa huna-huna sa usa ka batan-on nga ngano pa mang mangambisyon ko’g dako nga naa na man sa ako ang tanan nga gusto nakong pangayuon,” saysay ni Tagaro.
Saysay ni Tagaro nga naka apekto usab ang pamilya nga adunay dakong responsibilidad sa pag giya sa kaugmaon sa iyang mga anak.
“Naka apekto pud ang pamilya kay ang pamilya man goy mo-nourish sa iyang anak, kung unsa gyoy dangatan ug sangputan sa iyang anak sa umaabot. Nagsukad pud sa pamilya ang pagpa edukar sa iyang anak hangtud nga makahuman siya sa iyang pagtuon,” saysay niini.
Sumala sa usa ka psychologist nga si Jean Twenge, gihulma ang matag henerasyon sa mga batan-on pinaagi sa iyang palibot sama na lamang sa modernong panahon. Gani ginganlan ni Twenge ang henerasyon sa mga natawo sa 1995 ug 2012 isip “iGens” tungod sa pagka uso sa iPhones, paghatag og bili sa individualism ug uban pang factors diin nag una dinhi ang teknolohiya. Diin sa realidad, mas taas ang panahon ang igahin sa usa ka batan-on sa iyang gadget o sa social media kaysa sa iyang mga mahal sa kinabuhi ug sa iyang mga higala.
RadyoMaN Kirby Manzon
