Davao City – Subay sa record sa Department of Health, usa ang Davao Region sa nakatala nga adunay pinakadaghang kaso sa early pregnancy sa tibuok nasud gumikan sa early sexual activity nga gilambigitan sa nag-edad og 14 hangtud 15 anyos.
Sa datos niadtong 2017, ang Rehiyon Onse nakatala og kapin 16,000 ka kaso sa teenage pregnancies ug ang ang Davao City nakatala og kapin 4,000 ka kaso itandi sa ubang mga probinsiya sa tibuok rehiyon.
Matud ni Davao City Social Services and Development Office (CSSDO) Officer Marilyn Agono, upat ka rason ang ilang nakita nganong numero uno ang dakbayan sa adunay pinakataas nga kaso sa early pregnancy.
Kini mao ang kakulang sa atensyon sa mga ginikanan, walay monitoring sa tulonghaan, wala pagsuta sa kung kinsa ang mga barkada ug giubanan ug pagtugot sa taas nga panahon sa social media.
Kun gigiyahan lang unta sa mga ginikanan ang ilang mga anak, hayan dili unta sila masugamak sa sayo nga pakighilawas ug dili unta sila maburos ug magbaton og anak sa linghod pa kaayo nga pangedaron.
Gumikan sa kahimtang sa mga batan-ong babaye karon, ang CSSDO nagpakusog sa programa nga responsible parenthood ngadto sa kabarangayan aron matubag ang isyu sa early pregnancy.
Sumala ni Agono, nakig-alayon ang ilang buhatan sa mga barangay officials sa tibuok syudad aron ma-implementar gayod ang ilang programa sa grassroots level.
Lakip sa nasangpit nga programa ang counseling, pag-amping sa pagburos ug pag-edukar diha sa responsible parenthood ug pagbangon gikan sa pagkahagsa sa kinabuhi, dugang pamahayag ni Agono.
RadyoMaN Joel Viray
