Davao City – Adunay dakung responsibilidad ang matag barangay pinaagi sa Council for the Protection of Children diha sa pagpanton kon pag-disiplina sa tagsa-tagsa nila ka mga kabatan-on aron dili molambigit sa bisan unsang krimen sama sa riot sa mga rival gangs.
Sumala ni Ronaldo Rivera, Davao City Anti Drug Abuse Council (CADAC) Program Director, pakyas ang barangay sa pagpanguna sa Barangay Captain sa pagpakgang sa ilang kabatan-on sa pag-apil sa bisan unsang dili maayong kalihukan sa ilang lugar kun mosi-aw ang presensya sa mga teenage gangs diha sa komunidad.
Matud ni Rivera, gikinahanglang pakusgan ang ilang mga programa alang sa mga teenagers aron malikay sa bisan unsang mga binuang ang naasoyng bulnerableng sektor sa atong katilingban.
Tungod niini, nanawagan ang CADAC official sa matag barangay nga pahugtan ang ilang tagsa-tagsa ka mga Peace and Order Public Safety campaign aron adunay mga palisiya nga pagasundon aron usab walay mahitabong kagubot mugna or binuhatan sa mga pasaway kun badlongong mga kabatan-onan.
RadyoMan Bernard Pantallon
