Alarming na ang teenage pregnancy sa rehiyon 10.
Sa interview sa RMN Malaybalay ngadto kang Regional Director Jeremias Gupit, sa Population Commission kon Popcom Region 10 gibutyag niini nga kini kung ihulagway ang gidaghanon sa mga bata pang edad nga nagsabak na ug aduna nay anak.
Matud ni Gupit nga nigawas sa bag-ong talaan gikan sa ilang buhatan nga misaka ang ihap sa mga batan-on nga sayong nagmabdos o naka-anak na.
Gibutyag sa regional director nga ang rehiyon adunay pinakataas nga ihap karong tuiga sa tibook Pilipinas nga moabot ngadto sa 14 porsiyento.
Sigun niini nga ang teenage pregnancy mao kadtong 19 anyos paubos nga nagmabdos o aduna nay anak.
Bisan ang Department of Education wala na natago nga aduna gayoy tinun-an sa junior ug senior high school nga namabdos.
Sa interview sa RMN ngadto kang Sunny Ray Amit, ang OIC Assistant Schools Division Superintendent sa Malaybalay City Division gisiguro niini nga bisan adunay mga apil sa teenage pregnancy apan walay pagpihig ang ilang buhatan niini gani aduna pa silay espesyal nga programa alang kanila.
Samtang tambag usab sa Department of Social Welfare and Development kon DSWD nga kinahanglan bukas ang kada miyembro sa pamilya.
Sa interview sa RMN ngadto kang Cristy Omoyon, social worker sa DSWD 10 gibutyag niini nga kinahanglan muhatag ug panahon ang mga ginikanan ngadto sa ilang mga anak.
Tambag usab ninii sa mga anak nga kinahanglan maminaw sa tambag sa mga ginikanan.
Mao usab ang tambag ni Therese nga taga-Malaybalay nga usa ka mabdos sa iyang linghod pa nga pangidaron.
Sa interview sa RMN ngadto kang Therese nga mitras nagtungha pa ang usa ka batan-on kinahanglan nga magpukos una kini sa pagtoon.
Gipahinumdom niya nga walay magmahay nga mag-una kon dili anaa kini sa kaulahian.
Angayan matud pang hunahunaon sa mga manag-uyab sa makadaghan higayon kung ang ilang mga lakang nga pagahimoon makaayo ba kanila.
