Davao City – Dako og responsibilidad ang mga ginikanan sa paghulma sa kaugmaon sa ilang kabataan kay mao kana ang muhatag kanila og giya aron dili sila maadto sa kalautan sama sa sayo nga pagmabdos ug uban pang kalautan muabot sa ilang kinabuhi.
Segun ni City Social Services and Development Office Assistant Head Marilyn Agonia, magsugod ang tahas sa mga gininakan gikan sa pagkahimugso hangtud makabaton na og kaugalingong pagbuot sa ilang anak.
Matud ni Agonia, ang saktong paggiya sa mga kabataan mao ang paggahin og taas nga oras ug pagtudlo ug pagdisiplina maingon man ang pagmatutho sa pulong sa Dios sa mga gininakan sa ilang mga anak.
Kabahin sa obligasyon sa mga ginikanan mao ang paghatag og saktong edukasyon ug pagsiguro nga anaa sa eskwelahan ang ilang mga anak hangtud mahuman sa ilang pagtuon.
Apan gikinahanglan kanunay monitoron sa mga ginikanan ang kalihukan sa ilang mga anak sud sa eskwelahan aron mamaymayan sila ugali kung misulod na og uyab-uyab ang ilang mga anak.
Dili makamao mu-kontrolar sa pagbati sa gugma ang mga kabataan diin dunay dakong kahigayonan nga madala ug matintal gayod sila sa buhat mag-asawa ug ulahi nang mahibaloan kun mabdos na.
Suma ni Agonia nga ang pagtinabangay sa pagmonitor sa mga ginikanan ug mga magtutudlo ang epektibong armas aron mabatukan ang teenage pre-marital sex ug early pregnancy sa kabataan karon.
Dugang tambag ni Agonia nga limitahan pagpagamit og gadgets ug sa social sites aron dili ma-impluwensyahan ang pangisip sa ilang mga anak sa mga butang nga makita ug mabasa dinha sa internet.
RadyoMaN Joel Viray
