Davao City – Uyon si Barangay Maa Kapitan Jun Cañete sa sugyot nga siraduan una temporaryo ang mga merkado-publiko sa mga lugar sa dakbayan nga taas og risgo sa corona virus disease 2019 kon COVID-19.
Matud ni Cañete, ang temporaryo nga pagsirado sa mga merkado-publiko sa mga lugar nga ‘high risk’ ang pinakamaayo nga lakang sa panggamhanang lokal aron makontrolar ang pagkatag sa COVID-19.
Gisabot sa Kapitan ang mga vendors sa mga palengke apan gitindugan niini nga dili usab mahimo nga ang bagang duot sa katawhan maoy magsakripisyo sa epekto sa COVID-19.
Sa kahimtang susama karon, ang pagsinabtanay sa sitwasyon ang gikinahanglan karon ug agwantahon una ang pila ka adlaw nga walay abli ang mga palengke kay sa maong pamaagi mapukan ang dili makita nga kontra nga mao ang COVID-19.
Dungan ani, gidasig sa opisyal ang lokal nga gobyerno nga pakusgan pa ang ‘Kadiwa On Wheels’ o dili ba kaha magmugna og talipapa diha sa mga barangay aron mas sayon sa mga tawo ang pagpamalengke.
RadyoMaN Joel Viray
