Gipahinumdom sa Department of the Interior and Local Government nga sirado ang mga sementeryo, memorial parks ug kolombaryo sugod karong adlawa, Huwebes, October 29 hangtod November 4, 2020.
Kini subay sa kamanduan sa Inter-Agency Task Force for the Management of Emerging Infectious Diseases aron malikayan ang panagtigum sa daghang tawo sa panahon sa COVID-19.
Una nang gibutyag ni DILG Bukidnon Provincial Director Engr. Carmelo Libot sa interview sa RMN nga gihimo kini aron malikayan ang posibleng pagtinakdanay sa virus tungod sa kadaghan sa mga tawo nga muadto sa mga sementeryo.
Gipasabot usab niya nga temporaryo lamang kining gihimo tungod sa pandemya.
Nagtoo usab siya nga sa sunod nga tuig mubalik na sa normal ang tanan aron mahatagan ug panahon ang katawhan nga makaduaw sa ilang mga minahal sa kinabuhi nga nitaliwan na sa laing kalibutan sa mao nga espesyal nga adlaw.
Gibutyag usab ni Valencia City Legal Officer Atty. Marlowe Selecious, nga andam ang ilang siyudad nga sundon ang mao nga kamanduan.
Pwedeng makabalik ug bisita sa mga sementeryo karong Nobyembre 5 ning tuiga.
Nasayran nga gitigutan ang pag-adto sa mga sementeryo gawas sa mao nga petsa apan kinahanglang masunod ang minimum health standards ug 30% lamang ng capacity ang tugutan nga makasulod.
