Davao City- Posibleng dunay koneksyon sa gitawag nga liquidation squad ang suspek nga nagbilin sa bag nga dunay unod nga mga armas sulod sa bus.
Kini sumala ni Task Force Davao Commander Col. Erwin Bernard Neri.
Segun ni Neri ang maong mga armas posibleng magamit kini alang sa mga himuong dautang plano tungod kay usa lamang sa mga pusil ang dunay serial number ug ang uban wala na. Nasayran usab nga usa sa mga armas dunay silencer.
Busa kinahanglan madakpan ang suspek aron maestablisar ang koneksyon niini sa laing pang mga grupo ingon man ang tumong niini sa pagbyahe sa mga high powered firearms.
Subay niini gidayeg ni Neri ang k9 dog nga si ‘Lexi’ kinsa nakasakop sa bag nga dunay sulod nga armas gumikan napugngan niini ang pag-entra sa maong mga armas dinhi sulod sa Davao City.
Sa pikas bahin, base sa imbestigasyon sa Davao City Police Office gihulagway sa mga pasahero nga usa ka lalaki nga bulaw ang buhok ang malagmit nanag-iya sa maong butang.
Sumala ni DCPO Spokesperson PSI Ma. Teresita Gaspan, gituyo nog bilin sa suspek ang bag sanglit nasayod na kini nga adunay Task Force checkpoint sa may Licanan sa may Lasang, Bunawan.
Kasamang Aimee Guinita
