Davao City – Gipalapdan pa sa Task Force Davao (TFD) ang ilang intelligence monitoring sa posibleng diversionary attacks human sa nahitabong pagpamomba sa gituohang sakop sa Bangsamoro Islamic Freedom Fighters (BIFF) didto Koronadal City, South Cotabato niadtong adlawng Dominggo nga niangol ug pipila ka mga indibidwal.
Gibutyag ni TFD Commander Col. Nolasco Mempin atol sa interbyu sa DXDC nga iyang gipaalerto ang tanan niyang mga personahe ilabina sa mga checkpoints aron masegurong walay makalusot nga mga terorista, armas ug mga explosive devices dinhi sa dakbayan.
Bisan pa man walay mga namonitor nga posibleng himuong pagpangataki sa mga terorista dinhi sa dakbayan nagpabiling hugot ang ilang pagbantay aron magpabiling luwas ang mga Davaoeños ilabina karong taliabot nga eleksyon.
24 oras usab nga nagpatrolya ang Task Force Davao sa mga terminal, simbahan, pantalan, airport ug sa mga lugar diin dagsa ang mga tao.
RadyoMaN Aimee Guinita
