Roxas City, Capiz- Pila ka mga adjustment kag sistema subong ang ginapatuman sang Tricycle Franchising and Regulatory Unit ukon TFRU para sa renewal sang prangkisa sang mga traysikol sa city hall.
Suno kay TFRU head Mr Edgar Andrade, ginpakamaayo nila nga kun sin-o lamang ang nahatagan sang numero nga tubtob sa #50 sa aga, amu yadto ang iga- proseso tubtob nga matapos antes naman maghatag sang panibag-o nga set sang mga numero.
Target nila nga maka- akomodar sang isa ka gatos nga mga kliyente nga magaparenew sang prangkisa sa kada adlaw.
Ini agud nga malikawan ang paggilinutok sang mga magaproseso sa city hall kag agud nga maobserbar ang social/physical distancing. Gin-athag man ni Andrade nga tubtob pa sa Marso 15, 2020 ang deadline para sa renewal sang tricycle franchise samtang sa katapusan naman sang bulan sang Enero ang para sa business permit.
