General Santos City–Bingkil ang hinungdan sa pagpanigbas sa suspek nga si Baldo Liagaso, hingkod ang panuigon nga taga Purok 5, Barangay Tokawal, Alabel, Sarangani Province ngadto sa iyang manghod nga si Nelson Liagaso, 20 anyos, residenti sa maong barangay.
Sumala ni Manuela inahan sa biktimang si Nelson nga miuling hubog ang biktimang si Nelson sa balay sa iyang magulang aron unta maningil sa utang niini ngadto kaniya.
Apan nasuko matud pa ang magulang human nga gibato sa biktima ang balay niini mao nga nahitabo ang pagpanigbas.
Dugang pagbutyag ni Manuela nga Posibling wala nagkasinabot ang managsuon tungod hubog ang biktimang si Nelson.
Usa sa mga gikasuko matud pa sa suspek ang paglabay sa biktima ug bato sa iyang balay mao nga nikuha kini ug lagaraw ug gitigbas ang biktima. nasayran nga nagpabilin pa karon sa Dr. Jorge Royeca Hospital ang biktima human nakaangkon ug samad.
Wala hinuon misibat ang magulang human sa insidenti inay nagpabilin ra kini sa iyang panimalay. Wala pa usab nipatala sa buhatan sa kapulisan ang kabanay sa managsuon luyo paman sa insidenti.
