Masbate – Nasawi ang isang dating intel operative ng Regional Public Safety Battalion (RPSB) ng Bicol Region matapos tambangan ng Local Terrorist Group (LTG) sa Sitio Danta, Barangay Calipatan, San Jacinto, Masbate.
Batay sa report ng Masbate PNP, kinilala ang biktima na si retired SPO2 Rommel Borromeo.
Sa inisyal na imbestigasyon angkas ng motorsiklo ang biktima na minamaneho ng isang Antonio Barsaga ng bigla silang pinasabugan ng IED ng hindi matukoy na bilang ng mga terorista.
Matapos ang pagsabog ay pinagbabaril rin ang mga biktima gamit ang m16 rifle.
Sa ngayon nagpapatuloy ang pagtugis ng militar sa local terrorist group na responsable sa pagpatay.
Samantala patay rin ang isang ABC President ng Placer Masbate at isa pang lalaki makaraang pagbabarilin sa Daraga, Albay.
Sa ulat ng Masbate PNP, kinilala ang mga biktima na sina Rommie Bagaan at si ABC President Eric Tupas.
Naisugod pa sa pagamutan ang dalawang biktima ngunit ideneklara itong dead on arrival.
Nagpapatuloy pa ang imbestigasyon ng Masbate PNP sa krimen upang matukoy ang motibo sa pamamaslang.
