General Santos City–Gikumpirma ni Police Major Richard Ibañes labaw sa Tambler Police Station nga gikan matud pa sa Lanton City Jail kadtong biktimang si Jaylord Gilbuena kansa gipusil patay sa wala mailhing suspek samtang gabantay sa usa ka retailer store sa Calumpang Gensan niadtong adlaw nga Sabado Alas 2:00 sa hapon.
Matud pa ni Ibañes, napriso ang nasangpit tungod sa gikalambigitan niini sa illegal nga droga ug pag-apil-apil niini sa gikaingong rugby boys.
Posibleng dihang nakagawas kini sa prisohan mibalik sa iyang illegal nga gimbuhaton ug dunay nakalaban rason nga kini gipusil.
Nasayran usab sa kapulisan basi sa ilang padayong imbestigasyon migawas nga nahilambigit usab matud pa ang napatay sa akyat bahay nga nagalihukan sa ilang lugar, gani adunay ebidensiya ang otoridad nga gihuptan nga mao kini karon ang usa sa mga gilantaw nga motibo sa krimen.
Gipaklaro sa opisyal nga wala kini nasayod kung duna bay koneksyon ang kamatayon ni Gilbuena ngadto na sa gipusil nga tricycle driver sa Barangay Baluan gumikan kay kining biktimang napatay ang nanimuyo usab sa Brgy. Baluan.
Sa karon gimandoan na ni Ibañes ang iyang imbestigador nga makig-alayon sa Lagao PNP aron sayron kung duna bay koneksyon ang pagpamusil sa duha ka biktima.(RV)
