Nahimo napung produktibo tungod daghang nakuhang impormasyon ug nagiyahan sa makausa pa ang mga myembro sa nag-inusarang transport sector sa probinsya sa Sarangani nga mao ang STARTED kon Sarangani Transport Alliance for Reform and True Development, human sa nahitabo bag-uhay lang nga tinuig nga “Ugnayan sa Kapitolyo.”
Gitambungan kini mismo sa mga kadagkuan sa LTFRB ug LTO gikan sa national ug regional office kuyog ang mga municipal kagawad nga chairman sa komitiba sa transportasyon.
Ang Ugnayan sa Kapitolyo ang tinuig nga panagtigum sa mga myembro sa transport cooperatives og associations entiro Sarangani alang sa makanunayon nga inter-aksyon ngadto kanila isip kabahin sa prayoridad sa Sulong Sarangani flagship program ni Governor Steve Chiongbian Solon. Bise-gobernador pa kaniadto si Governor Solon iya ng gi-organisa ang STARTED.
Anaa mismo nitambong sa maong panagtigum gikan pa sa kauluhang Maynila si Mr. Joel Bolano, ang chief sa technical division sa LTFRB Central Office maoy gipadala ni LTFRB Chairman Atty. Martin Delgra, kauban sila LTFRB Regional Director Paterno Padua, LTO Assistant Regional Director Robert Kiunisala, ug si Nestor Lumawig sa Regional Development Council-Road Safety Program.
Naka-sentro ang mga gihisgutan kabahin sa nagpadayon ug ang gibarugan nga programa ni Pangulong Rodrigo Duterte nga Public Utility Vehicle Modernization Program nga mapatuman sa tibuok Pilipinas sa Hunyo 2020.
Paspas ang pagtuyok sa mga personahe sa LTFRB ug DOTr aron mapasabot ang kamahinungdanon sa maong programa nga walay laing katuyuan kundili matagaan og saktong seguridad dili lang ang mga pasahero kundili apil na ang mga public utility driver ug operator.
Ilalum sa Public Utility Vehicle Modernization Program, adunay fix nga sweldo ang madawat sa kwalipikadong drayber. Daghan unya ang ma-hire nga mga drayber pabor pud sa mga operator tungod kay mutaas ang oras sa pagpamasada “by shifting.” May giandam nga binilyong pondo ang LandBank ug DBP aron maka-loan ang buot magpa-brand new sa ilang mga sakyanan basi sa “ceiling distance” nga itakda sa balaod.
Gipaniguro ni Board Member Arman Guili, ang transport committee chairman, duyog si Vice Governor Elmer De Peralta, anaa pud sila Board Members Odoy Jamora, Joseph Calanao, Jong Falgui, Tata Galzote ug Tatang Paras, nga makamugna og Local Public Transport Route Plan kon LPTRP ang Sarangani, aron mahan-ay ang mga prangkisa ug makadawat sa mga benipisyo sa maong transport modernization program lakip na ang TESDA skills training ngadto sa mga drayber. Sa kasamtangan, wala pay probinsya sa nasud nga na-aprobahan ang ilang LPTRP.
Sa bahin ni STARTED President Mrs. Merly Nebres, gipanghinaot niini nga padayong makunsulta ang mga driver-operator aron hanoy lang kini mapatuman. Gidasig niini ang mga kaubanan nga mu-mugna nag consolidated o hiniusang kooperatiba isip usa ka legal entity aron malinawon lang kini mu-operate sa parehong ruta. Walay laing handum sila Governor Solon, Senador Manny ug Congressman Ruel Pacquiao kundili ang pagtinabangay sa tanang sektor.
